MAJINA YA WAGOMBEA URAIS YANASWA MAKABURINI... KUNA NI?..

KAZI imeanza! Baada ya ukimya wa muda mrefu uliotokana na Mfungo wa Mwezi Mtukufu wa Ramadhani, sasa makamanda wa Oparesheni Fichua Maovu ‘OFM’ imeingia kazini ambapo wiki hii imeweza kuinasa nazi ikiwa na karatasi lenye majina ya waliojitokeza kugombea urais, ubunge na udiwani kwenye uchaguzi mkuu ujao.

Tukio la aina yake, lilinaswa kwenye Makaburi ya Mwananyamala, Dar ambapo OFM walikuwa katika pitapita zake za kusaka matukio ya kila siku.

Wakati OFM wakikatiza eneo hilo, baadhi ya wakazi wa eneo hilo walikuwa wakitoka makaburini hapo saa nne asubuhi huku gumzo likiwa ni akina nani wamethubutu kufika kwenye makaburi hayo na kutupa nazi hiyo iliyopasuliwa kidogo na karatasi lake pembeni.

“Unajua hawa ni wapambe tu. Si wao wenyewe. Mgombea urais gani anaweza kuja hapa makaburini Mwananyamala kutupa nazi na karatasi lenye majina ya wagombea wote hawa. Ili iweje kwanza?

“Inawezekana kuna kundi la watu ndiyo wameamua kufanya vile kwa sababu ya ushirikina wao. Lakini inatisha. Uchaguzi wa mwaka huu jamani, acheni tu,” alisikika akisema mkazi mmoja wa eneo hilo aliyejitambulisha kwa jina la Zubeda Hassan.

OFM ilitia timu kwenye makaburi hayo na kushuhudia uchawi huo ambapo nazi hiyo ilikuwa na majina ya wagombea urais, lakini pia karatasi ilionesha majina hayo sanjari na ya wagombea ubunge na udiwani wa vyama mbalimbali ambao wengi wao wameanguka katika kura za maoni.

Wakati OFM inapiga picha, mwanaume mmoja aliyekataa kujitambulisha jina alifika na kuwatimua akisema kuwa, yeye ndiye mwenye dhamana ya kuamua nani apige picha na nani asipige na kwamba watu waliotupa vitu hivyo hapo walisema wangerudi kesho yake kuangalia kama kazi ilifanyika au la! (hakusema ni kazi gani).

Wakati viashiria vya uchawi kwenye makaburi hayo yakiishia hivyo, Afisa Habari wa Klabu ya Yanga ya jijini Dar, Jerry Muro naye hivi karibuni alijikuta katika wakati mbaya baada ya kudai kuandamwa na mambo ya kilozi kufuatia vijana wawili kuvunja nazi na mayai mbele yake wakati akitangaza nia ya kugombea ubunge katika Jimbo la Kawe kwa leseni ya Chama Cha Mapinduzi (CCM).

Tukio hilo lilijiri wakati wa zoezi la wagombea kujinadi kwa wapiga kura kwenye Uwanja wa Mabatini Kata ya Msasani, Dar, majira ya saa 5:00 asubuhi.

Akizungumzia tukio hilo, Jerry aliwaambia OFM kuwa, ishu hiyo ilimshtua na kudai kuwa siasa za aina hiyo zinatia shaka.

“Baada ya wenzangu kama 20 kumaliza kutoa sera zao, ilipofika zamu yangu. Wakati najieleza ndipo waliibuka vijana wawili na kuvunja nazi mbili na mayai mbele yangu.

“Ni jambo la fedheha na kunisikitisha sana, tuombeane ndugu zangu hali yangu ni tete kwani huu ni ushirikina wa waziwazi,” alisema Jerry.

Hata hivyo, vijana hao walikamatwa na kupelekwa kwenye Kituo cha Polisi cha Oysterbay jijini Dar kwa maelezo zaidi.

Waandishi: Mayasa Mariwata, Shani Ramadhani na Gabriel Ng’osha.

BOFYA HAPA KWA KUJIUNGA NASI MOJA KWA MOJA NA LIKE PAGE YETU

HII NI MO DESIGN