ODINGA: KENYATTA NI RAISI WA KOMPUTER... ATANGAZA KWENDA MAHAKAMANI...

Kiongozi wa upinzani nchini Kenya Raila Odinga ametangaza kwamba muungano wake wa National Super Alliance utawasilisha kesi mahakamani kupinga ushindi wa Rais Uhuru Kenyatta katika uchaguzi mkuu uliofanyika Jumanne wiki iliyopita.

Bw Odinga alikuwa amesema ingawa muungano huo ulikuwa umeapa kutowasilisha kesi kortini wakati huu, wameona ni heri kufanya hivyo "kufichua uovu uliotokea wakati wa uchaguzi mkuu."

"Tumeamua kwenda kortini kufichua jinsi uongozi wa kompyuta ulivyofanikishwa," amesema Bw Odinga akiwahutubia wanahabari mtaa wa Lavington, Nairobi.

"Hawa ni viongozi wa kompyuta. Kompyuta ndiyo iliwataga, kompyuta iliangulia, kompyuta iliwatoa. Vifaranga vya kompyuta."

Kiongozi huyo amesisitiza msimamo wa NASA kwamba uchaguzi haukuwa huru na wa haki.

Amesema mitambo ya Tume ya Taifa ya Uchaguzi IEBC ilidukuliwa na matokeo kuvurugwa kumfaa Bw Kenyatta ambapo kulikuwa na pengo kiasi fulani kati yake na Bw Odinga muda wote wa kutangazwa kwa matokeo.

"Mtindo huu ulitokea pia katika maeneo mengi na kwenye uchaguzi wa ugavana. Jambo kama hili halijawahi kutokea katika uchaguzi wa kidemokrasia pahala pengine popote duniani. Lakini ilitokea hapa," alisema.

Bw Odinga amesema udukuzi huo una uhusiano na kuuawa kwa meneja wa teknolojia katika tume hiyo Chris Msando ambaye aliuawa wiki moja kabla ya uchaguzi.

Filed Under: kimataifa

KENYA: ONDINGA ACHEMKA KUATANGAZA HATUA ATAKAYOCHUKUA BAADA YA KUDAI KUIBIWA KURA

Muungano wa upinzani nchini Kenya National Super Alliance (Nasa) umeahirisha kikao cha kutoa tangazo kuhusu mweleko wa chama hicho kufuatia uchaguzi mkuu wa Jumanne wiki iliyopita.

Kiongozi wa muungano huo Raila Odinga alikuwa ameahidi kwamba angetangaza ni hatua gani atachukua leo baada ya kupinga matokeo ya uchaguzi yaliyotangazwa Ijumaa, ambapo mpinzani wake Rais Uhuru Kenyatta alitangazwa mshindi.

Ajenti mkuu wa Nasa Musali Mudavadi amesema sasa muungano huo unapanga kutoa tangazo kesho Jumatano.

"Tunasikitika kwamba mashauriano yanachukua muda mwingi kuliko ilivyotarajiwa na Nasa kwa hivyo hawataweza kuwahutubia Wakenya kama walivyotarajia leo."

Bw Mudavadi hata hivyo amesema mashauriano "yanaendelea na yanaendelea vyema".

Rais Kenyatta alitangazwa mashindi kwa kura 8,203,290 huku naye Raila Odinga akipata kura 6,762,224.

Hapo jana, Bw Odinga alikuwa ametoa wito kwa wafuasi wake kususia kazi kabla ya kutoa tangazo kubwa leo.

Watu wengi hata hivyo walionekana kupuuza wito wa kususia kazi.

Baada ya kutokea kwa maandamano katika baadhi ya maeneo ambayo ni ngome ya upinzani mitaa ya Mathare na Kibera jijini Nairobi na mji wa Kisumu, hali ya utulivu ilianza kurejea Jumatatu.

Filed Under: kimataifa

KUPIMA UKIMWI NI LAZIMA - ZAMBIA

Rais wa Zambia Edga Lungu amesema kuwa kwa sasa ni lazima kila mtu apimwe hali yake ya ugonjwa wa ukimwi nchini humo.

Zambia ni kati ya nchi zenye viwango vya juu zaidi vya ukimwi kusini mwa bara la Afrika kwa asilimia 11.6, huku watu walio na umri wa kati ya miaka 15 na 49, wakiwa na wanaishi na virusi vya ukimwi

Bwana Lungu alisema kuwa kupimwa na kupewa ushauri na matibabu sio kitu cha kujitolea, katika jitihada za kukabiliana na ugonjwa wa ukimwi nchimi humo.

Alitoa tangazo hilo wakati wa uzinduzi wa baraza la ukimwi  mji mkuu wa Zambia - Lusaka.

Bwana Lungu alisema kuwa suala hilo limezungumziwa na baraza la mawaziri.

Filed Under: kimataifa

RAIS WA ZAMANI AFRIKA YA KUSINI AMPINGA JACOB ZUMA..

Rais wa zamani wa Afrika Kusini, Kgalema Motlanthe, anasema kuwa hana uhakika iwapo atakiunga mkono chama tawala cha African National Congress-ANC, kinachoongozwa na Jacob Zuma, katika uchaguzi mkuu ujao.

Bw Motlanthe amesema kuwa, kura yake kwa ANC haifai kuchukuliwa kama 'iliyotiwa kwenye kapu' itapotimia uchaguzi mwaka wa 2019.

Bw Motlanthe, ambaye alihudumu kwa muda mfupi kama rais kati ya 2008 na 2009 na alikuwa wakati mmoja wa naibu wa rais Zuma, aliashiria kuwa alijaribu kumshawishi kiongozi huyo kuondoka mamlakani zaidi ya mwaka mmoja uliopita.

Aliongeza kuwa hafurahishwi na mtazamo wa baadhi ya mawaziri wa kutojali masuala ya uchumi wa nchi, huku waziri mpya wa fedha akijaribu kutuliza hofu katika mkutano wa Benki ya dunia mjini Washington (Ijumaa) kufuatia kushuka kwa kiwango cha uchumi nchini Afrika Kusini

Ijapokuwa Kgalema Motlanthe alikuwa kidogo asaliti chama chake ambacho amehudumu kwa miaka mingi, alisema kura yake kwa ANC "haingepeanwa" wakati wa uchaguzi mkuu mwaka wa 2019.

Ni mmojawapo wa viongozi wa kwanza watajika kushuku hali ya baadaye ya ANC chini ya uongozi wa Jacob Zuma ambaye alikuwa rafiki wake wa karibu katika uongozi.

Zuma atakumbana na kura ya kutokuwa na imani Bungeni mwezi ujao huku upinzani ukionekana kuwa mkali - ijapokuwa bado ana ushawishi mkubwa maeneo ya mashambani.

Atakayemrithi Zuma kama kiongozi wa ANC atachaguliwa na chama mwishoni wa mwaka lakini Kgalema Motlanthe amedokeza kuna haja ya dharura.

Alisema ANC " inazama kwa makosa iliyofanya ambayo yamefurika" na kutabiri kuwa kumuunga mkono kiongozi wake itamaanisha kwa uhakika kwamba ANC itapoteza utawala wa wengi katika uchaguzi miaka mbili zijazo.

Filed Under: kimataifa

HII HAPA YA MKENYA ALIYESHINDA KITI CHA USENETA AUTRALIA...

Mwanamke mmoja mzaliwa wa Kenya Lucy Gichuhi, anatazamiwa kuwa mtu wa kwanza mwenye asili ya kiafrika kuketi kwenye baraza la bunge la seneti lenye waakilishi 76, ikiwa uteuzi wake utathibitishwa na mahakama kuu, gazeti la The Guardian limeripoti.

Bunge la Seneti la Australia, lina nguvu ya kurekebisha au kumtimua mbunge.

Alipata kiti hicho baada ya mwenzake kutoka chama cha Family First -FF, Bw Bob Day, ambaye awali alishinda kwenye uchaguzi, kulazimishwa kuachia kiti hicho.

Bi Gichuhi, ambaye ni mhasibu na wakili, alihamia Australia mnamo mwaka 1999 na akapata uraia wa nchi hiyo miaka miwili baadaye, hii ni kwa mjibu wa taarifa kutoka kwa runinga ya ABC.

ABC imemnukuu akisema:

"Ninashukuru kwa heshima kubwa kwa kupewa nafasi hii ya kuwatumikia wa-Australia....ninalichukulia kama fursa kubwa ya kulitumikia taifa hili kubwa."

Tangazo la mtandaoni, kwamba angekabiliwa na upinzani ikiwa ingebainika wakati fulani kuwa ana uraia wa mataifa mawili, lakini alisema kuwa "ana haki ya kutumikia".

Filed Under: kimataifa

ABIRIA AJIFUNGUA MTOTO NDANI YA NDEGE AKIWA ANGANI...

Wahudumu wa ndege ya shirika la ndege la Uturuki, walisherehekea kuwasili kwa abiria mwingine angani umbali wa futi 42,000 au mita 12,800, wakati mwanamke mmoja alijifungua mtoto msichana.

Abiria nao walisaidia kuzaliwa kwa mtoto huyo, muda mfupi baada ya ndege hiyo kupaa kutoka mji mkuu wa Guinea, Conakry, ikielekea Isanbul kupitia Burkina Faso.

Mama wa mtoto huyo aliyepewa jina Kadiju, walipelekwa hospitali wakati ndege hiyo aina ya Boeng 737 ilipotua mji mkuu wa Burkina Faso, Ouagadougou.

Wote waliripotiwa kuchoka lakini walikuwa na afya nzuri.

Wahudumu waligundua kuwa mwanamke mmoja abiria kwa jina Nafi Diaby, alikuwa akihisi uchungu wa kujifungua.

Hapo ndipo walichukua hatua ya kumsaidia kujifungua ndege ikiwa safarini.

Mashirika mengi ya ndege huruhusu mama walio wajawazito wa hadi wiki 36 kusafiri, lakini uhitaji barua ya daktari wakifikisha wiki 28 kuonyesha tarehe wanayotarajia kujifungua.

NGOMA MPYA "DAMU TULIZA MOYO

Filed Under: kimataifa

FEDHA ZACHANGISHWA KUPINGA SHERIA YA TRUMP

Kongamano la kuchangisha fedha linafanyika nchini Ubelgiji baadae leo ili kuimarisha afya ya uzazi miongoni mwa wanawake katika mataifa masikini ambayo yameathirika kufuatia hatua ya Marekani kutishia kusimamisha msaada kwa serikali zinazokubali uavyaji mimba kama njia ya mpango wa uzazi.

Siyo mara ya kwanza kwa utawala wa Republican kusimamisha ufadhili kwa huduma za mpango wa uzazi katika mataifa masikini yanayokubali uaviaji mimba.

Hata hivyo utawala wa sasa wa Rais Donald Trump umeweka vikwazo zaidi na kulenga mashirika yasiyo ya serikali ambayo hutoa ushauri nasaha kuhusu uavyaji mimba.

Hii ina maana kwamba huenda ufadhili ukasimamishwa kwa mashirika yanayowasaidia wagonjwa wa ukimwi pamoja na huduma za afya ya uzazi.

Ili kujaza pengo hilo mataifa ya Uholanzi, Sweden, na Denmark yameandaa kongamano maalum la kuchangisha fedha mjini Brussels, Ubeljiji.

Hazina hii inajulikana kama 'Haki ya mwanamke kuamua'.

Baadhi ya wadadisi wamesema licha ya juhudi hio, hata hivyo kunahitajika mamilioni ya dola ili kuboresha afya ya uzazi miongoni mwa wanawake.

Filed Under: kimataifa

MAHAKAMA YAKATAA RUFAA TRUMP...

Mahakama ya rufaa nchini Makareni imekataa ombi kutoka kwa idara ya haki nchini humo la kutaka kurejeshwa amri ya Trump ya kupiga marufuku wasafiri kutoka nchi saba zenye waislamu wengi kuingia Marekani.

Serikali ilikuwa imeitaka mahakama kurejesha amri hiyo baada ya uamuzi wa jaji kwenye mahakama ya Seatttle wa kupiga marufuku amri hiyo.

Bwana Trump alikashifu uamuzi huo wa jaji akisema kuwa unaiweka Marekani kwenye hatari ya kushambuliwa na magaidi.

Mashirika makubwa ya usafiri wa ndege, yangali bado yanawakubalia raia kutoka mataifa hayo husika, kusafiri na ndege na kuingia Marekani.

Kumekuwepo na maandamano dhidi ya marufuku hiyo ya Trump huko Washington, jimbo la Miami na miji mingine kadhaa ya Marekani, pamoja na miji mingine mikuu ya bara Ulaya.

Wakati huo huo, Rais Trump ametetea uhusiano wake na Rais Vladimir Putin, katika mahojiano ya Runinga, huku akikataa kupinga madai ya mtangazaji kuwa Rais huyo wa Urusi ni muuaji.

Katika mahojiano ambayo yatapeperushwa na runinga ya Fox News baadaye leo Jumapili, Bwana Trump ameashiria kuwa Marekani isijifanye kutokuwa na hatia, kwani pia ina wauaji wengi.

Amesema kuwa anamheshimu Bwana Putin, na itakuwa jambo bora zaidi ikiwa Urusi itasaidia Marekani kupambana na wanamgambo wa kundi la Islamic State.

Filed Under: kimataifa

AL-SHABAB WASHAMBULIA KAMBI YA MAJESHI YA KENYA...

Kundi la al-Shabab nchini Somalia limesema wapiganaji wake wameshambulia kambi ya wanajeshi wa Kenya wanaohudumu chini ya kikosi cha Umoja wa Afrika (Amisom)nchini Somalia.

Wapiganaji hao wanadai kuwaua wanajeshi wengi kwenye shambulio hilo katika kambi ya Kulbiyow kusini mwa Somalia karibu na mpaka wa nchi hiyo na Kenya.

"Mujahideen (wapiganaji) wawili walivurumisha magari yaliyokuwa na mabomu na kuyalipua kwenye lango la kambi hiyo ya mji wa Kulbiyow kabla ya wapiganaji wengine kuingia. Baada ya makabiliano makali, tumefanikiwa kuiteka kambi," mmoja wa wasemaji wa al-Shabab Sheikh Abdiasis Abu Musab ameliambia shirika la habari la Reuters.

Msemaji huyo amedai kundi hilo limewaua wanajeshi zaidi ya 50 na kutwaa magari na silaha za wanajeshi hao, taarifa ambazo msemaji wa majeshi ya Kenya amekanusha.

Kanali Paul Njuguna ameliambia Reuters: "Ni uongo. Operesheni ya kijeshi inaendelea. Tunaendelea kupokea taarifa."

Al-Shabab wamekuwa wakipigana dhidi ya serikali ya inayoungwa mkono na mataifa ya magharibi na jamii ya kimataifa.

Wanajeshi wa Kenya pamoja na wanajeshi kutoka Djibouti, Uganda na Ethiopia, chini ya Amisom, wamekuwa wakisaidia serikali hiyo yenye makao yake Mogadishu.

Januari mwaka uliopita, wapiganaji wa al-Shabab walishambulia kambi ya majeshi ya Kenya el-Adde na kuua wanajeshi wengi.

Al-Shabab walisema waliua zaidi ya wanajeshi 100. Jeshi la Kenya halijatangaza idadi kamili ya wanajeshi waliouawa hadi wa leo.

Filed Under: kimataifa

TRUMP AVISHAMBULIA VYOMBO VYA HABARI KUHUSU KUAPISHWA KWAKE...

Siku moja baada ya Rais wa Marekani Donald Trump kuchukua hatamu y a uongozi wa taifa hilo, amelaamu baadhi ya vyombo vya habari kwa kueneza taarifa za uongo juu ya idadi ya watu waliyohudhuria sherehe ya kuapishwa kwake.

Trump amesema zaidi ya watu milioni moja walihuthuria shere hiyo.

Msemaji wa White House, Sean Spicer,amesema vyombo hivyo vya habari vinaendesha kampeni ya kugawanya watu kwa kuangazia habari ambazo hazina msingi wowote.

Hata hivyo kanda za video za matangazo ya moja kwa moja wakati wa hafla hiyo hazikunasa umati mkubwa wa watu.

Picha zinaonekana zikionyesha watu wengi waliohudhuria shereha ya kupiashwa kwa rais Barack Obama mwaka 2009.

Bwana Trumpo hakuzungumzia maandamano wakati alitembelea makao makuu ya CIA jimbo la Virginia siku ya Jumamosi, lakini badala yake alishambulia vyombo vya habari.

Bwana Trump alisema kuwa video na picha wakati wa kuapishwa kwake zilionyesha taarifa ziziso za ukweli.

"Walionekana kama watu milioni 1.5 siku nya Ijumaa, alisema Trump, na kuzua ripoti za vyombo vya habari kuwa walikuwa wati chini ya 250,000.

Rais huyo mpya aliwataja waandishi wa habari kuwa watu waongo zaidi duniani.

Filed Under: kimataifa

ALIYEKUWA RAIS WA GAMBIA KUACHIA MADARAKA... AWASILI EQUATORIAL GUINEA

Aliyekuwa rais wa Gambia Yahya Jammeh amewasili nchini Equatorial Guinea, siku moja baada ya kuachia madaraka kwa Adama Barrow, aliyemshinda katika uchaguzi wa urais mwezi Disemba mwaka jana.

Jammeh alisafiri kwa ndege kutoka Banjul hadi Guinea na baadaye kuendelea na safari yake kwenda Equatorial Guinea.

Hapo jana Bwana Jammeh alitangaza kwamba atang'atuka baada kuongoza Gambia kwa miaka 22.

Kwa mujibu wa jumuiya ya kiuchumi ya Afrika magharibi ECOWAS, Jammeh amewasili nchini Guinea . Siku ya Alhamisi ECOWAS illituma vikosi vyake nchini Gambia kumshurutisha Bwana Jammeh kukubali Adama Barrow aapishwe.

Jumuiya hiyo inasema imesitisha oparesheni yake ya kijeshi Gambia lakini wanajeshi elfu saba watasalia nchini humo kudumisha usalama, huku Adama Barrow akitarajiwa kurejea Gambia kutoka nchi jirani ya Senegal muda mfupi ujao.

Filed Under: kimataifa

MTU WA MWISHO KUKANYAGA MWEZINI AFARIKI DUNIA

Mwana anga wa Marekani Gene Cernan, aliyekuwa binadamu wa mwisho kutembea kwenye Mwezi, amefariki dunia akiwa na miaka 82.

Shirika la anga za juu la Marekani Nasa limesema limehuzunishwa sana kumpoteza mwana anga huyo mstaafu.

Cernan alikuwa mmoja wa watu watatu pekee waliowahi kwenda Mwezini mara tatu na ndiye binadamu aliyeukanyaga Mwezi mara ya mwisho kabisa, mwaka 1972.

Maneno yake ya mwisho aliyoyasema kabla ya kuondoka kwenye Mwezi yalikuwa: "Tunaondoka jinsi tulivyokuja na, Mungu akitujalia, tutarejea na amani na matumaini kwa binadamu wote."

Alikuwa kamanda wa chombo cha anga za juu cha Apollo 17 wakati huo.

Ni watu 12 pekee waliowahi kutembea kwenye Mwezi, na kati yao ni sita pekee ambao bado wako hai.

Kupitia taarifa, familia ya Cernan imesema alifariki dunia Jumatatu baada ya kupata matatizo ya kiafya.

Hawakutoa maelezo zaidi.

Kabla ya kufanya safari ya Apollo 17, Cernan alikuwa amesafiri anga za juu mara mbili awali - mwaka 1966 na 1969.

Alistaafy mwaka 1976 na akaingilia biashara kibinafsi. Alikuwa mara kwa mara akichangia katika runinga kuhusu masuala mbalimbali.

Cernan pia aliandaa makala ya video kuhusu maisha yake.

Alizaliwa 14 Machi 1934 mjini Chicago, na jina lake kamili ni Eugene Andrew Cernan.

Ameacha mjane Jan Nanna Cernan, bintiye na binti wawili wa kambo pamoja na wajukuu wanane.

Kifo chake kilitokea wiki chache baada ya mwana anga mwingine wa Nasa John Glenn kufariki dunia.

Filed Under: kimataifa

NANA AKOFU ADDO WAKILI WA ZAMANI AAPISHWA KUWA RAIS GHANA...

Wakili wa zamani wa haki za kibinaadamu, Nana Akufo-Addo, ameapishwa kuwa rais mpya wa Ghana, katika sherehe iliyohudhuriwa na viongozi kadha wa Afrika.

Katika hotuba yake ya kwanza, Nana Akufo-Addo, alimsifu rais anayeondoka madarakani, John Dramani Mahama, kwa namna alivokiri kushindwa katika uchaguzi wa mwezi uliopita.

Viongozi kadha wa Afrika walikusanyika katika mji mkuu wa Ghana, Accra, kuhudhuria sherehe za kutawazwa rais mpya, Nana Akufo Addo.

Maelfu ya wageni walialikwa kwenye sherehe katika Medani ya Uhuru mjini Accra.

Bwana Akufo Addo, aliyewahi kuwa wakili wa haki za kibinaadamu, alimshinda Rais John Dramani Mahama, katika uchaguzi wa mwezi uliopita.

Baada ya kuapishwa kwa rais, sasa viongozi waliohudhuria sherehe hiyo, watajadili namna ya kuhakikisha kuwa Rais wa Gambia, Yahya Jammeh, anaondoka madarakani.

Kiongozi huyo amekataa kustaafu ingawa alishindwa katika uchaguzi wa Mwezi Disemba.

Filed Under: kimataifa

WAHAMIAJI WANAVYOINGIA UHISPANIA...

Maafisa wa polisi wamewakamata raia wawili wa Morocco ambao walijaribu kuwaingiza wahamiaji katika eneo linalotawaliwa na Uhispania lililo kazkazini mwa Afrika la Cueta- wawili hao wakiwa wamejificha ndani ya gari na mwengine katika sanduku.

Wakati maafisa wa polisi walipokagua gari moja siku ya Jumatatu ,mtu mmoja alipatikana amefichwa katika eneo la mbele la gari na mwengine amefichwa katika eneo la kiti cha nyuma cha gari.

Mwanamume huyo na mwanamke ,wanaodaiwa kuwa raia wa Guinea ,walipata huduma ya kwanza kwa kuwa walikuwa na hewa kidogo ya kupumua.

Kwengineko kijana mmoja wa asili ya Kiafrika alipatikana amefichwa katika sanduku la mwanamke.

Kisa hicho kilitokea mnamo mwezi Disemba 30 na mtu huyo anayeaminika kutoka Gabon alihitaji matibabu ya dharura.

Mwanamke mwenye umri wa miaka 22 kutoka Morocco alijaribu kumuingiza Cueta, lakini maafisa wa uhamiaji walimuagiza kufungua sanduku lake ambalo lilikuwa limefungwa katika kitoroli.

Kisa hicho kinajari wakati ambapo kumekuwa na jaribio la wahamiaji wengi kuvunja ua wa mita sita unaogawanya Cueta na Morocco.

Raia 50 wa Morocco na 5 wa Uhispania walijeruhiwa wakati wahamiaji 1,100 walipojaribu kupita ua huo na kuingia Cueta kutoka Morocco.

Hakuna aliyefanikiwa kupita ,lakini watu wawili walijeruhiwa walipokuwa wakivunja ua huo na kupelekwa hospitalini huko Ceuta.

Mlinzi mmoja alipoteza jicho lake kulingana na maafisa.

Kisa kama hicho mnamo tarehe 9 Disemba kilihusisha zaidi ya wahamiaji 400 kutoka Afrika.

Filed Under: kimataifa

RAIA 20 WAUAWA KIKATILI MASHARIKI MWA CONGO DRC

Takriban raia 20 wameuawa katika mauaji ya kikatili katika jimbo la Kivu ya Kaskazini nchini Jamuhuri ya Kidemokrasi ya Kongo, kulinga na taarifa zilizotolewa na maafisa Jumapili.

Vifo hivi ni vya hivi karibuni katika wimbi la miaka miwili la ghasia katika jimbo hilo.

Mauji hayo yametokea katika mji wa Eringeti, uliopo kilomita 55 kaskazini mwa mji mkuu wa jimbo hilo wa Beni, mji ambao umekuwa ukikumbwa na misururu ya mashambulio ambayo tayari yamesababisha vifo vya raia 700, kulingana na afisa katika mkoa huo Amisi Kalonda, ambaye amewalaumu waasi kutoka Uganda kwa mashambulio ya hivi karibuni.

Bwana Kalonda amesema kuwa wajumbe wa kundi la waasi la Allied Democratic Forces (ADF), kundi lenye idadi kubwa ya Waislam wenye itikadi kali kutoka Uganda ambao wamekuwa kwenye kanda hiyo kwa zaidi ya miongo miwili , walivamia mji huo Jumamosi mchana.

"ADF wamevamia tena wau wa Eringeti na maeneo yanayozingira mji huo asubuhi ," aliliambia shirika la habari la AFP, kutoka mji mkuu wa Kivu kusini wa Goma.

"Jana, waliwauwa raia 10. Miili mingine ya watu kumi na miwili ilipatikana Jumapili katika vijiji vinavyozingira mji ." alisema Bwana Kalonda akiongeza kuwa waathiriwa waliuliwa kwa visu au panga''

Kwa miaka miwili iliyopita eneo linalozingira mji wa Beni limekuwa likikimbwa na mauaji ya kikatili

yaliyowauwa mamia ya raia, wengi wao wakichinjwa na kunyongwa hadi kufa.

Maafisa wa Kongo wamekuwa wakiwalaumu waasi wa ADF kwa mauaji hayo , lakini ripoti kadhaa za wataalam zimekuwa zikisema kuwa makundi mengine, yakiwemo ya wanajeshi wa serikali yalihusika katika baadhi ya mauaji.

Msemaji wa jeshi la Kongo Mak Hazukay amethibitisha shambulio, akisema wanajeshi ''waliwauwa waasi wa ADF " lakini akaongeza kuwa " idadi ya raia waliokufa ni kubwa".

Teddy Kataliki, mkuu wa shirika maarufu la kiraia katika kanda hiyo, pia alisema kuwa waliouawa ni 22.

Lakini kasisi wa kikatoliki katika eneo hilo amesema kuwa waliouawa ni watu 27 na idadi inaweza kuongezeka zaidi " kama miili ya waliouawa itabainika katika msitu" unaopakana na mji huo.

Wakati mauaji ya kikatili ya Beni yalipofanyika Oktoba 2014, ADF walijibu haraka wakishutumu makundi mauaji hayo kutekelezwa na maafisa wa Jamuhuri ya Kidemokrasi ya Kongo na MONUSCO---Kikosi cha kulinda amani nchini DRC.

Kwa zaidi ya miaka miwili sasa, mamlaka za kongo na Umoja wa Mataifa zimeshindwa kuwalinda raia na ADF limesalia kuwa ndilo kundi linalotawala, huku serikali ikisisitiza kuhusu uhusiano wa mauaji hayo na vita vya kidini vya Jihad.

Mauaji haya yanatokea huku mahusiano baina ya jamii ya kimataifa na DRC ukiwa mbaya kutokana na hatua ya rais Josep Kabila kukataa kuachia mamlaka, licha ya muhula wake kumalizika taraehe 20 Disemba.

Filed Under: kimataifa

RAIS KABILA KUONDOKA MADARAKANI MWAKA 2017...

Wapatanishi katika Jamhuri wa Kidemokrasia ya Congo, wameandaa mwafaka wa kuhakikisha kuwa madaraka yanapokezwa kwa njia ya amani.

Mashauriano yaliyoandaliwa na Kanisa Katoliki, yanafuatia kukataa kwa Rais Joseph Kabila, kuondoka madarakani baada ya utawala wake wa mihula miwili kukamilika.

Chini ya mapatano hayo Rais Kabila ataendelea kuwa Rais hadi wakati wa uchaguzi ifikapo mwisho wa mwaka ujao.

Waziri Mkuu mpya atachaguliwa kutoka kwa upande wa upinzani na mpango huo utasimamiwa na mkongwe wa upinzani, Etienne Tshisekedi.

Habari zinasema kuwa, ingawa kuna ripoti kuwa pande kinzani zimekubaliana kwa maswala fulani, haiwezekani sahihi za mkataba huo kutiwa sahihi kabla ya Krismasi.

Kukataa kwa Bwana Kabila kuondoka madarakani na kuahirishwa kwa uchaguzi kumesababisha maandamano makali katika barabara kuu za miji nchini Jamhuri ya Kidemokrasia ya Congo.

Filed Under: kimataifa

TRUMP AITAKA MAREKANI KUBORESHA SILAHA ZA NYUKLIA

Donald Trump ameitaka Marekani kuboresha zaidi uwezo wake wa zana za nuklia.

Rais huyo mteule ambaye ataingia ofisini mwezi ujao amesema kuwa Marakani ni lazima ichukue hatua kama hizo, hadi wakati ulimwengu utatathmini suala la nuklia.

Trump aliyazungumza hayo saa kaadha baada ya rais wa Urusi Vladimir Putin kusema kuwa Urusi inahitaji kuboresha uwezo wake silaha za nuklia

Marekania ina silaha 7,100 za nuklia huku Urusi ikiwa inamiliki silaha 7,300 kulingana na shirika la kudhibithi silaha la marekani.

Trump aliyaandika hayo kwenye akaunti yake ya mtando wa twitter

Wakati wa kampeni, Trump alisema kuwa silaha la nuklia ndilo tatizo kubwa zaidi linaloikumba dunia.

Mgombea wa chama cha Democratic Hillary Clinton mara kwa mara alimtaja Trump kuwa mtu asiye na uvumilivu wa kuweza kuzuia vita vya kinuklia.

Filed Under: kimataifa

KIONGOZI WA UPINZANI ASHINDA URAIS GHANA...

Mwanasiasa mkongwe ameshinda uchaguzi wa urais nchini Ghana, ushindi ambao umepokelewa kwa shangwe na nderemo na wafuasi wake.

Nana Akufo-Addo, alishangilia ushindi wake na kusema taifa hilo sasa ni mwenge wa demokrasia Afrika Magharibi.

Ameahidi kukabiliana na uchumi uliozorota, swala ambalo lilitiliwa mkazo wakati wote wa kampeni,

Bw Akufo-Addo alisema kuwa ushindi wake ni hatua anayofurahia sana katika maisha yake yote na akaahidi kuwa atafanya kila juhudi kuhakikisha kuwa anatekeleza matakwa ya wananchi wa Ghana.

Amepongezwa na mshindani wake mkuu, rais John Mahama, aliyeahidi kuheshimu matokeo ya uchaguzi.

Filed Under: kimataifa

TETEMEKO LABOMOA NA KUUA TENA...

Tetemeko kubwa la ardhi limeua watu zaidi ya 24 na kusababisha uharibifu mkubwa katika mkoa wa Aceh nchini Indonesia.

Maafisa wanasema watu wengi wamefukiwa kwenye vifusi vya majumba yaliyoporomoka.

Tetemeko hilo la nguvu ya 6.4 kwenye vipimo vya Richter lilitokea karibu na mji wa Sigli katika kisiwa cha Sumatra ambapo majumba mengi yameporomoka.

Shirika la utabiri wa hali ya hewa la Indonesia limesema hakuna hatari ya kutokea kwa kimbunga.

Mwaka 2004, mkoa wa Aceh uliathiriwa sana na kimbunga kilichosababishwa na tetemeko kubwa baharini. Watu 120,000 waliuawa mkoani humo.

Taasisi ya Jiolojia ya Marekani imesema tetemeko hilo lilitokea karibu na pwani mwendo wa saa 11:03 asubuhi saa za huko (22:03 GMT Jumanne) katika kina cha 17.2km (maili 11) chini ya ardhi.

Said Mulyadi, naibu mkuu wa wilaya ya Pidie Jaya, eneo lililoathiriwa pakubwa na tetemeko hilo, ameambia idhaa ya BBC ya Indonesia kwamba huenda idadi ya waliofariki ikaongezeka.

Filed Under: kimataifa

MAJIVU YA MWILI WA FIDEL CASTRO YAZIKWA SANTIAGO, CUBA

Majivu ya aliyekuwa rais wa Cuba Fidel Castro yamezikwa katika kiunga cha makaburi mjini Santiago, na hivyo kumaliza siku tisa za maombolezo ya kitaifa nchini Cuba.

Familia na wageni wachache walialikwa katika shughuli hiyo ya faragha, iliyofanywa karibu na makumbusho ya shujaa wa uhuru wa Cuba, Jose Marti.

Hapo jana, rais wa Cuba, Raul Castro, amesema serikali yake itakataza barabara au eneo lolote kupewa jina la Fidel, na ndivyo Fidel mwenyewe alivyoagiza.

Mbele ya mhadhara mkubwa mjini Santiago, alisema Fidel Castro hakutaka kufanywa kama kiongozi wa madhehebu.

Filed Under: kimataifa